وقائع مصرية

وقائعى باللغة العربية

مش عايزينها تتجوز

في 22 أبريل 2008

مجلة روز اليوسف المتحدثة بأسم النظام أعلنت الحرب على الفيس بوك و قرر القائمين عليها تخصيص تقرير خاص على اكتر موقع الشعب المصرى بيدخله خاصة بعد اضراب الرابع من ابريل

االفيس بوك كما صورت المجلة لصياع و الشواذ و العيال الضايعة اللى عايزة تعمل منظر !!

الغريب ان الصحفية اللى قامت بهذا البحث لم تذكر ان رئيس التحرير عبد الله كمال عضو نشيط جدا فى الفيس بوك و عنده تطبيقات غريبة و تافهة زى “How hot I am ?? ” عالفكرة هو شله

الجميل ان ذكر فى كلمته فى العدد انه عضو و ان ناس كتير اوى بتضيفه فى قائمة الاصدقاء “لا ادرى السبب الحقيقى !!””

المهم ما استوقفنى فى التقرير الغبى الكاذب هجوم و استخفاف غير مبرر على المدونة صاحبة مدونة و كتاب “عايزة اتجوز” ا

الغريب ان الصحفية قالت ان صاحبة المدونة هى نادية حسن عالرغم ان اسمها غادة عبد العال

تحديث : نادية حسن عالفكرة  هى من انشا مجموعة معجبى مدونة عايزة اتجوز “واجب التنويه ”

المجلة بتتدعى ان المدونة عايزة اجوز لم تلق نجح “تروح تشوف مدونة رئيس التحرير ” و انها عملت مجموعة فى الفيس البوك لترويج لمدونتها و انضم اليها الاف من طلبى الزواج !!؟؟

هى الهانم اللى كتبت الموضوع مش عارفة ان الانسة غادة عندها كتاب ناجح اصدرته دار الشروق !!؟؟

و بعدين ليه لو على المجموعات اللى فى الفيس بوك فين الجروب الرائع بتاع رئيس تحريرها اللى عملوه بنفسه علشان ينشر مقالاته !!؟

نفسى اعرف اشمعنى غادة ؟؟ و مدونتها ؟؟

هو ده اللى اتنشر يا جماعة !!؟؟

Advertisements

20 responses to “مش عايزينها تتجوز

  1. HoNdA كتب:

    عالم جاهله وعايزة الناس تبقا جاهله ومتخلفه زيهم فلازم يركزو ع مساوىء الحاجة الى حاسيين انهم ممكن تعمل نهضة وتغيير وتنضيف للعقول
    كمان اوقات الحقد الطبقى بيظهر فى اللحظات الى زى دى اكيد صعبان عليهم ان واحدة تنجح وينزلها كتاب وهيا ملهاش واسطه او مش من فطالحه الكتاب الى لازم ينزلهم كتب بس
    فى ناس مبتعرفش تبنى فوظظيفتها انها تهدم عشان متحسش بنقص !!!!!!!!!!!

  2. Abderrahman كتب:

    ديانا الضبع دي سخصية حقيقية؟ ولا اسم رمزي ؟ اغلب موضوعاتها عجيبة

  3. محمد كتب:

    أولا : أحب أشكرك علي التنويه أن أقلام السلطة لها وجود في عالم التدوين .

    ثانيا : روز اليوسف ديه مكانها اللي تستحقه هي سلة القمامة .

    ثالثا : عايز حد يترجملي الجملة المتخلفة ديه ” لم تلق المدونة اقبالا شديدا ”
    طب والله ضحكت لما قرأتها … خصوصا كلمة شديدا

  4. Ahmed Nasr كتب:

    الموضوع كله هبل والصحفية دي أصلا واضح انها مش عارفة طريقة عمل فيسبوك كما يجب..
    نادية حسن دي واحدة عملت إيفنت تبع جروب المدونة، وهي كمان أدمن عالجروب لأن غادة عبدالعال معملتش الجروب لنفسها أصلا..

  5. بكداش كتب:

    هجمات مستمرو من روز يوسف علي الفاس بوك والمدونون المصريين..
    وكلام فازغ..

  6. zeinobia كتب:

    @iهوندا , بالفعل انا عندى احساس ان هناك غيرة و كره لغادة

    @عبد الرحمن الله اعلم و الله مش مستبعدة زى ما نادية العابد هى فى الاصل مفيد فوزى و انور وجدى هو فى الاصل ابراهيم سعدة

    ً@محمد , الاقلام السلطوية دى دخلية على التدوين اساسا اللى بيعمله الرجل ده فى مدونته عبارة عن نشر مقالاته الفاشلة

    @أحمد ,عالفكرة انا فكرت كده برضة ان نادية هى الادمن شكرا لتوضيح

    @بكداش مش اول و لا اخر مرة

  7. eman osama كتب:

    روز اليوسف دى مجله حقيره و اصبحت بوق من ابواق الحكومه
    كفايه مواضيعها عن ان الحجاب مش فرض و غيره
    و بعدين يعنى ايه المدونه لم تلق اقبال شديد جدا خالص اوى دى هاهاهاها
    و الله العظيم ناس فاضيه
    انا عارفه الفيس بوك فارس الحكومه عشان موضوع الاضراب لكن ايه دخل الجروب بتاعنا فى الموضوع و انا ست متجوزه من تلاته عشر سنه و اخواتى الاتنين و بنات خالاتى كلنا اعضاء فى الجروب ده
    حسبنا الله و نعم الوكيل
    و مبروك يا ناديه صحيح دخلت التاريخ و النبى خايفه يقبضو عليكى زى اسراء

  8. Doaa Mohamed كتب:

    السلام عليكم ورحمة الله وبركاته
    تصحيح معلومات:

    الدكتورة/ غادة عبد العال … صاحبة مدونة عايزة اتجوز و الذى حولته دار الشروق لكتاب و نزل من طبعتين.

    الاستاذ/ محمد الشافعى … انشئ جروب محبى مدونة عايزة اتجوز “الناجح جدا” على الفيس بوك، ويناقش قضايا المجتمع التى تهم الشباب من الجنسين بشكل محترم.

    المهندسة/ نادية حسن … احدى اعضاء الجروب والتى اصبحت ادمن للجروب، وعملت ايفينت على الجروب بالتعاون مع “رسالــة” لمساعدة الشباب المتعثر فى الجواز فى محاولة لجعل الجروب ايجابى فقط لاغير .

  9. dalia كتب:

    اولا اللى اتكتب ان دل على شئ فهو يدل على الجهل التام واسؤا شئ ان انسان يدعى انه صحفى ويكتب عن حاجة لا قرا عنها ولا عرفها لمجرد ان جاله امر بكده وخلاص

    اولا الهجوم عموما ع الفيسبوك طبعا معروف ايه اسبابه لانه قدر يعمل فى مده قصيرة اللى مقدرش ناس كتير تعمله فى سنين، وجمع كلمة عدد كبير من الشباب اللى كام واخد الموضوع تسبية مش اكتر لكن بعد كده اتجمعوا على اهداف اكبر واقوى والدليل اللى حصل فى اضراب ابريل

    ثانيا الجهل المطلق فى موضوع مدونة (انا عايزة اتجوز ) وكانها هى اللى خربت الاقتصاد المصرى مثلا ولا نشرت البطالة، وواضح ان الاخت اللى بتتملى اللى بتكتبه مكلفتش خاطرها لا تقرا المدونة ولا الكتاب ولا حتى موضوعات الجروب

    ولمعلوماتها الجروب متعملش علشان الناس اللى عايزة تتجوز ولا الناس التافهه ، وكمان مش غادة عبد العال اللى عملت الجروب، اللى انشا الجروب أ/ محمد الشافعى مش نادية حسن مع الاحترام ليها كعضوة نشيطة فى الجروب

    الظاهر المسالة بقت سد اى باب نقدر نقول فى راينا حتى لو كان مجرد موقع او عالم افتراضى نعيش فيه، وحكاية الصحافه بقت اكل عيش وسبوبة وكانها بتشطب قيشانى مش بتكتب عن وعى

    ولا يمكن رئيس التحرير بتاعها مفروس من نجاح غادة عبد العال ونشاط الجروب وهو قاعد يشوى درة!!!

  10. محمد الشافعي كتب:

    LOOOOOOOOOLS
    جهل جهل اخر حاجه 🙂

    اولا المدونه ناجحه جدا و الدليل عدد الزوار و كمان اختيارها من قبل دار الشروق و طبعا كلنا عارفين دار الشروق و بتنشر لمين
    pppppppppp:

    ثانيا واضح من اللينك ده مدى نجاح الكتاب
    http://www.boswtol.com/aldiwan/nkasakees_192_06.html
    pppppppppp:

    مش غادة كمان اللي عملت الجروب عالفيس بوك علشان تشهر المدونه و كمان لما الجروب اتعمل غادة ماكنتش تعرف
    ppppppppppp:

    الف مبروك يا ناديه 🙂

    صحافه على ماتفرج صحيح
    pppppppppp:

  11. رانيا الريس كتب:

    المقال ده ده عار على الصحافة على الصحافة المصرية وعيب انه يشار اليه كمقال. اللي أعرفه يعني ان الواحد لما يبقى عايز ينقد حد يعمل بحث واف على الحاجة اللي هينقدها.
    ومن الواضح ان اللي كتب المقال سمع كلام من حد وبناءا عليه كتب اللي كتبه من غير ما يعمل أي مجهود.

    أولا: الفيس بوك مجال للتعارف على أصدقاء والتواصل مع ناس انقطعنا عنهم من فترة، وكل وسيلة ليها عيوبها ومميزاتها. واللي بيستخدم الوسيلة دي بشكل غير محترم ده لا عني ان كل اللي بيستخدموها غير محترمين.

    ثانيا: صاحبة المدونة د/ غادة عبد العال مش نادية حسن

    ثالثا: منشيء الجروب ع الفيس بوك أ/ محمد الشفاعي مش نادية حسن (نادية أدمن للجروب بس)

    رابعا: كاتب المقال ما قراش الكتاب ولا المدونة لأنها من الواضح مش عارفة بتتكلم على ايه أصلا

    خامسا: الجروب مش للي بيواجهوا مشاكل العنوسة لأن كتير من المشتركات متزوجات. ولكنه بيناقش قضايا عامة زي اللي تتطرقت ليها المدونة من خلال النماذج المطروحة بها، يعني بيناقش مشاكل الرجل والمرأة المرتبطة بالزواج وماهواش زي مواقع الزواج المعروفة.

    سادسا: المدونة فعلا مش ناجحة خالص بدليل:
    – ان عدد زوارها على حد علمي وصل لـ200,000 زائر
    – تم نشرها في كتاب ونفذت الطبعة الأولى واتعمل طبعة تانية
    – تم استضافة صاحبة المدونة في برامج ناجحة مثل العاشرة مساءا والبيت بيتك
    – تم ترشيح المدونة ما بين أنجح عشر مدونات مصرية
    – تم كتابة مقالات عدة عن المدونة في مصر وكمان في الولايات المتحدة

    وشكراااااااااااااا

    رابعا:

  12. رانيا الريس كتب:

    تصحيح: منشيء الجروب محمد الشافعي (مش محمد الشفاعي)

  13. شيماء فكرى كتب:

    الصراحه انا مش عرفا اقول اه على الصحفيه دى فعلا الصحافه مبقيتش هى صوت الشعب ولا اى حاجا دى بقت مجرد شغلانه والسلام
    يعنى الصحفين بقوا عملين زى عوجيز الفرح بيقولا اى كلام والسلام
    فعلا المدونه مش بتتكلم عن وحدا عوزا تتجوز لاء خالص المدونه تحمل معانى اكتر من كدا بكتير انا مش هتكلم عنها علشان الى مقرهاش يقراءها
    ثانيا غاده مش هى الى عملت الجروب الى عمل الجروب محمد الشافعى الى انا شخصيا بهنى و بشكروا كتير على الجروب الجميل ده
    ثالثا ناديه برضوا مش هى الى عملت الجروب ناديه دى ادمن و عضوا فى الجروب وانا بشكرها على المجهودات الى عملتها اخير لمساعده الشباب الغير قادر على تحمل مصاريف الزواج ويارب كلنا نساعد ونشارك
    اما بالنسبه لائن المدونه غير ناجاحه فانا معنديش اى تعليق غير انها تدخل وتكلف خاطرها بعض دقائق بدل ماتقول كلام هى متعرفوش فا تدخل وتشوف عدد الاعضاء و كمان المواضيع الى بتتنافش فيها ربما تستفيد حاجا وكمان تعرف عدد الاعضاء الى بيزيد يوم بعد يوم
    وربنا يوفقها فى حاجا تانيه غير الصحافه
    هههههههههه

  14. رحاب احمد كتب:

    انا مش عارفة ازاى حد يدعى انه صحفى و يكتب موضوع من غير ما يكلف نفسه انه يجمع عنه معلومات

    انا مش حضيف معلومات تانى اكتر من اللى اعضاء الجروب قالوها قبلى
    بس عايزة اوضح ان مدونة غادة من اعلى المدونات من حيث عدد الزوار و عدد التعليقات
    وده يثبت قد ايه هى ناجحة و ده طبعا اللى دفع دار نشر محترمة زى دار الشروق انها تجمع المدونة فى كتاب هو دلوقتى من اعلى الكتب مبيعا والكلام ده كله مثبت بارقام و احصائيات

    نجاح غادة مصدره الأساسى انها بنت مصرية بكل ما تحمل الكلمة من معانى .. عقلها و طريقة تفكيرها واحترامها لنفسها و احساسها بأهمية قرار الزواج وانه مينفعش يتاخد بخفة او لمجرد التخلص من ضغوط المجتمع اللى ممكن يضطر بنات كتير انها تتجوز و خلاص والا يتهمها بأنها ” مش عايزة تتجوز ”
    ومن هنا جه اسم المدونة اللى بيأكد انها – زى اى بنت – عايزة تتجوز و تكوّن بيت و اطفال بس هى – برضه زى اى بنت بتفكر صح – عايزة تختار زوج يفهمها و يصونها و تعيش معاه حياه مستقرة

    افتكر طول مافيه ناس من نوع الأستاذه اللى كتبت المقال فى الصحافة المصرية يبقى مفيش اى امل فى مصر اصلا ..

    والسلام ختام

  15. أحمد هندى كتب:

    صلاة الجنازة
    —————
    صلاة الجنازة على روح الشهيدة الفقيدة مجلة روز اليوسف
    التى ذهبت و ضاعت بعد أن وقعت أسيرة بعض الهواة غير المحترفين

    و يا ليتهم هواة بضمير و لكنهم للأسف جاااهلووون

    خلاص اتعميتوا مافيش نظر ؟؟؟؟؟

    واحد بينقد من غير مايعرف أى بيانات عن المنقود ؟؟؟؟؟؟؟
    !!!!!!!!!!!!!!!!!!!!

    ده تخلف بكل معانى الكلمة

  16. احمد مجدي كتب:

    السلام عليكم
    طبعا المقال مش محتاج تعليق
    لأنه هو في حد ذاته تعليق
    تعليق على مدى السذاجة اللي وصلت ليها دار صحافة كانت في يوم من الايام بيكتب فيها محمد التابعي و عباس العقاد و محمد حسنين هيكل
    اصبحت الآن مرتعاً لأشباه الصحفيين والهواه
    الله يرحمك يا روز
    الفاتحة !!
    —————————
    للأسف مفيش حد عنده وقت يدخل يتفرج على المدونة ولا الجروب ولا حتى يقرا الكتاب
    وقت الصحفيين اصبح مشغول بما هو اهم مما يكتبون عنه !!!
    فعلا .. اصبحوا فاقدي البصر والبصيرة
    وهي دي مصر يا عبلة!

  17. RADWA FOUAD كتب:

    كل شئء في بلدي أصبح مثير للغثيان!! حزينة!!!

  18. تالت مرة يحصل توارد الخواطر ده بيني وبينك. اكتر حاجة حرقت دمي لكن ضحكتني في نفس الوقت من الحملة الشعواء على الفيس بوك في روزا هو موضوع مدونة غادة ده. بس كده هما اتكشفوا قوي وواضح انهم طلعوا مرة واحدة على الفيس بوك يستلقطوا اي حاجة ينتقدوها وخلاص علشان طلبوا منهم يقولوا ان الموقع ده وحش.

  19. نادر كتب:

    مسا الخير احب اقول كلمة مصر فين منا ضاعت منا باظط منا بشر ضاعو و معدش فية كامة الحق بقي كلمة والعدل كلمة وربنا قال للبشر كلمة !!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!! ومعدش فية كلمة ……….عشان كدة هما يخافو من كلمة0

  20. أعتقد إن أى حد هايقرأ المقال و عارف مدونة ” عايزة أتجوز ” و مشترك فى الفيس بوك هايجد المقال مضحك نوعاً ما لوضوح جهل الكاتب و لو المدونة لم تلقى إقبالاً شديداً اتعرفت إذاي طيب ؟ سواء على الفيس بوك اللى انضملها الالاف المؤلفة زى ما المقالة بتقول ؟
    شكراً على التنويه.

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: