وقائع مصرية

وقائعى باللغة العربية

30 سنة على حرب الكواكب

في 30 مايو 2007

الجمعة الفات قعدت اتفرج طول اليوم على سلسلة حرب النجوم الشهيرة فى مصر بحرب الكواكب اساسا لا اعلم لماذا تسمى بحرب الكواكب و هى معناها الصحيح حرب النجوم ما علينا

انا من عشاق تلك السلسلة الجبارة سواء القديمة او الجديدة

عالرغم انى تعبت اقوى من الفرجة على 6 افلام وراء بعد الا انها متعة اولا  القصة وضحت امامك و لما توضح امامك معالم الملحمة الفضائية اللى كتبها عمك جورج لوكس و هو فى الجامعة هاتتفأجا انك امام قصة ذات مغزى سياسى خطيرة خاصة فى الحلقات الاولى الثلاث “تهديد الشبح و هجوم المسنتسخين و انتقام السيث” حيث تجد نفسك فى عالم مقارب للواقع حيث يلعب المستشار بلباتين لعبة جامدة جيدة ليصبح الامبراطور الاوحد للمجرة الامبراطور الذى يسيطر عن طريق الخوف الامنى

لقد اصبح الامبراطور بعدما اعطى له مجلس المجرة صلاحيات اكثر فاكثر بسبب الخوف من الانفصالين ,الانفصالين اللى كان ورائهم السنياتور اللى اصبح الامبراطور

خطة سياسية  عبقرية الغريب ان قى ارض الواقع تم استخامها التخلص من الاعداء واحد تلو الاخر علشان الساحة تبقى فاضية بتفكرك بجمال عبد الناصر و حافظ الاسد “مع عدم الاعتذار لمحبيهما”

و اقوى  جزء فى الافلام كان التخلص من فرسان الجيداى عن فارس منهم باع نفسه لقوى الظلام ليس للسلطة و لكن بسبب الحب

قصة حب اناكين لبادميه تحفة خاصة مع موسيقى جون ويليامز العبقرية بعزف اوركسترا لندن السيمفونى

و يبقى الامل مع ثمرة حب بادميه و اناكين سكاى ووكر مع لوك وليا  فرسان الجيداى اللذان  سيجلبان التوازن الى القوة و يهزما الامبراطورية لتعود الحمهورية

حقيقة انا مش عارفة ازاى واحدة زاى القمر زى ناتلى بورتمان و الوسيم هايدن كريستيان بجبوا عيال سخيف زاى لوك و ليا بالفعل الفرق الزمنى كان مسخرة عالفكرة ان باحب بادميه اكتر من ليا

و كمان بحب هان سولو عالرغم انا مش من معجبىهاريسون فورد “عالرغم برضه اناندنايا جونز كان البطل المفضل لى و انا صغيرة كان نفسى ابقى زيه او حتى يبقى عندى نفس البرينطة ” عن لوك سكاى ووكر يخرب بيته واد مراهق سخيف

وانا صغيرة كان نفسى و لازل حفيقى انى امتلك الاليين زى “ار2 دى2” و الطويل الاهبل اللى معه

لو اتيحت لى الفرصة فانا نفسى اعيش فى مدينة نابو او فى بلاد الشلالات اللى بتقع فى ريفها

اه و نفسى يبقى عندى دبدوبة زى الدبادبيب اللى انقذوا المجرة فى الجزء السادس “عودة الجيداى” الغريب ان قوات الامبراطورية و دراث فيدار عمرهم ما عرفوا بوجود المخلوقات البدائية الطيبة دى و يمكن ده سبب تدميرهم من منطلق يوضع سره فى اضعف خلقه بالفعل هم اللى جعلوا المعركة الاخيرة تحسب اللثوريين لانهم كانوا خارج الحسبة

نرجع لمعنى الملحمة اللى اخيرا فهمتها و او يمكن حبت افهما بطريق دى  الحلقة الثالثة انهت بالهروب الكبير للاخيار و انتصار بشكل ما للاشرار و اناكين  صار  دراث فيدار  و صرخ بصوته اللى صار الالكترونى “وا بدمياه” الا ان الحلقة الرابعة كانت بالفعل الامل الجديد لوجود فارس جبداى  اخير الا و  هو لعبث الاقدار ابن اناكين لا ادرى فى  ارض الواقع متى سيأتى الجيداى المنقذ ليعد القوة  هيبتها  و الحد يفهم

لا يفل الحديد الا الحديد

عالفكرة خبر جامد لوكاس هيعيد انتاج حرب الكواكب على اساس  مسلسل تليفزيونى لا تقولى لوست او جراى انتومى

دمه خفيف اوى يودا لما قابل سكاى ووكر جونير  استعبط عليه حلو

اوبى وان كونوبى ايان ماكجوير  كان جامد بس اليكس جبنس اجمد بصوته و تمثيل فى الثلاثية القديمة

جورج لوكس جدد نهاية الحلقة السادسة باضافة احتفالات مدن كورسنت وتاتوين و نابو

 اجمل حاجة فى لقطة النهائية عندما يرى لوك ارواح فرسان الجيداى  من يودا و اوبى و ابوه الحمد الله  لوكاس كان زكى بما يكفى ان يغير الرجل التخين الاقرع بهايدن كريستيان خاصة انه اعطى معنى ان دراث فيدار  رجع تانى  بقى اناكين

و كل سنة و مجانين حرب النجوم اللى زى طيبين

عالفكرة اه رايكم نتخيل  او مخرج مجنون مصرى قرر سرقة الملحمة و تقديمها فى مصر مين اللى يمثل فى الفليم ؟؟

Advertisements

7 responses to “30 سنة على حرب الكواكب

  1. sherif nagib كتب:

    أنا ماحسيتش بجنون حرب النجوم في أمريكا الشمالية غير لما وقفت في طابور طويـــــل أنا و صحابي عشان ندخل الفيلم في أول يوم. و لما الموسيقى الشهيرة ابتدت مع التتر و نزول الكلام بطريقة السكروللنج المعتادة هاج جمهور السينما و قام بالتصفيق بجنون و لقيت نفسي متحمس زيهم و باسقف و أصفر و انتباتني نشوة ستار وورز مع إني مش مغرم بالسلسلة كقصص. إنما يكفي أقول لك إن ستار وورز من الحاجات اللي خلتني مغرم بعالم الخدع السينمائية و المؤثرات البصرية من صغري.
    كان حظي حلو إني شفت لقطات من الفيلم ده قبل نزوله في ندوة عن المؤثرات البصرية اللي في الفيلم.. بس حرقولنا لقطات منه في الندوة دي 🙂

    مش غريب إنك تحسي إن للفيلم مغزى سياسي أو اسقاط ديني، لأن جورج لوكاس مستوحي الفيلم من الكتاب العظيم “بطل بألف وجه”، و دي صفحته :
    http://en.wikipedia.org/wiki/Hero_with_a_Thousand_Faces

    الكتاب بيحلل العديد من الحكايات الخاصة بالشخصيات الدينية و الاسطورية و بيوصف في النهاية ما يسميه بـ “رحلة البطل” و انها بتمشي دايماً على اسطمبة واحدة بها العديد من العناصر، و لو بصيتي لمئات الأفلام الأمريكية الناجحة ستجدينها تتبع نسق رحلة البطل.. من “آني هول” لـ “ماتريكس”.

    خلينا في المهم ،،

    أوبي وان كانوبي — خالد صالح
    لوك – خالد النبوي
    هن سولو – هشام عبد الحميد
    و أخيراً هالة صدقي في دور الأميرة ليا

  2. zeinobia كتب:

    تصدق يا شريف فى مصر ديما باشوف الافلام دى فى شيراتون و دايما باكون المصرية الوحيدة !!
    اكمل على القايمة بتاعك “جامدة اوى هالة صدقى ”
    غادة عادل السيناتور بادمية اميدالا ظ ممكن سهير زمزى علشان الازياء
    هانى سلامة فى دور اناكين خاصة انه هايغل فر روحه حلو
    صوت دراث فيدر محمود ياسين
    صوت يودا عادل امام مش الزعيم برضه

  3. zeinobia كتب:

    شريف قولى ما هى شركة الاستضافة اللى بتعامل معها ؟؟

  4. sherif nagib كتب:

    أسف أنا نسيت خالص لما سألتيني.. الشركة هي :
    http://www.ixwebhosting.com

    أحسن حاجة فيها إن الدعم التقني شغال 24 ساعة على الشات، يعني مش لازم تكلميهم بالتليفون دولي زي شركات تانية كتير.
    خدمتهم ظريفة و أنا مبسوط منهم لحد دلوقتي.

  5. ربيع كتب:

    أنا بيجيلي نفس الشعور لما أسمع المزيكا ، و لو كنت لوحدي بامسك نفسي و أنا بابتسم زي الأهبل
    أجمل شخصية بالنسبة لي يودا ، و اللي متوقع ان شعبان عبد الرحيم هايأدي دورة بامتياز

  6. zeinobia كتب:

    بالفعل شعبان هايبقى يودا ممتاز خاصة رشاقته و كمان انافته

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: